اعملي مع رانيا صابونة للتخسيس ومزيل طبيعي للماكياج

 


قبل ما نبدأ في وصفاتنا، عايزة أؤكد إنك علشان تخسّي وتحصلي على قوام رشيق، لازم تلتزمي بنظام غذائي صحي ومتوازن وتكثري من تناول الفاكهة والسلطة الخضراء، وتحرصي إنك تحصلي على الـ3 وجبات الأساسية في اليوم؛ لأن مش معنى إنك مابتاكليش طول النهار إنك تخسي، بل على العكس حرمان الجسم من الأكل طول اليوم بيؤدي لنتائج عكسية وبيتسبب في زيادة الوزن..

ودلوقتي يلّا نبدأ ونشوف الوصفات والماسكات الطبيعية اللي هنعملها مع بعض..
صابون للتخسيس بالزيوت الطبيعية
المقادير:
10 ملعقة كبيرة صابون مبشور (يفضّل صابونة جلسرين أو أي صابونة عادية من غير إضافات)
خليط من (ملعقة كبيرة قرفة مطحونة + ملعقة كبيرة قرنفل مطحون)
9 ملعقة كبيرة من كوكتيل الزيوت الحارقة للدهون
½ كوب ماء

ملحوظة: الزيوت الحارقة للدهون عبارة عن خليط من مقادير متساوية من زيت الزنجبيل وزيت القرنفل وزيت القرفة وزيت البردقوش وزيت شجر الشاي الأخضر.

الطريقة:
حطّي الميه في حلة على النار، وضيفي عليها خليط الزيوت اللي عندك، وسيبيهم مع بعض على النار لغاية ما الميه تبدأ تغلي، وبعد كده ضيفي الصابون المبشور، وقلّبيهم مع بعض باستخدام الملعقة الخشبية على نار هادية لغاية ما الصابون يسيح تماما، وبعد كده ضيفي خليط القرفة والقرنفل.

بعد كده صبّي الصابون في قوالب وسيبيها لغاية ما تنشف تماما خلال أسبوع، وممكن تستخدميها كل يوم وإنتي بتاخدي الشاور بتاعك، وبتستخدميها بعد ما بتغسلي جسمك كويس بالشاور جل العادي والليفة، وقبل ما تخرجي من الحمام ممكن تدهني جسمك بخليط الزيوت الحارق للدهون اللي عملنا منه الصابونة.

لبن جوز الهند.. مزيل طبيعي للماكياج
المقادير:
4 - 5 ملعقة كبيرة لبن جوز الهند
ملعقة صغيرة زيت لوز حلو
عصير ½ ليمونة
عصير ¼ برتقال

الطريقة:
اخلطي لبن جوز الهند مع عصير الليمون وعصير البرتقال، وبعد كده ضيفي عليهم زيت اللوز الحلو، واحتفظي بالخليط ده في برطمان زجاجية، واستخدميه كل يوم بالليل لإزالة الماكياج، باستخدام قطنة مع عمل مساج للبشرة من أسفل لأعلى، والخليط ده مش بس بيشيل الماكياج لكنه كمان بيرطب البشرة والرقبة والإيدين، وممكن تحتفظي به في الثلاجة.

لوشن الزهور لتعطير وترطيب الجسم
المقادير:
قطعة فازلين صغيرة
ملعقة كبيرة زيت ورد
ملعقة كبيرة زيت ياسمين
ملعقة كبيرة زيت عنبر
ملعقة كبيرة زيت فل

الطريقة:
سيّحي الفازلين على نار هادية، وضيفي عليه الزيوت مع تقليبهم، وبعد كده صبّي الخليط ده في برطمان زجاجي، واستخدمي منه على جسمك كله والمناطق الحساسة والكوع والركب.